بقاياي_بندر المحاسن

وصل الى حدود ذلك الوطن وهو محمل بطفوله ممزقه ومراهقه مبعثره وشباب باهت .!
ارتمى على ترابه واخذ يلتقط انفاسه ليبدأ بعدها مرحلة البحث عن  طفله الذي افتقده او انه لم يولد بعد... طفل يعيد له بريق شبابه الذي خفت ويروي زهوره اللتي بدأت بالذبول ويذيب الجليد الذي تكون في حياته وحاصر قلبه
اخذ غفوة صغيره لكي يستطيع استعادة نشاطه

ولكن .!

نهض من نومه فجأه وهو لم ينم الا قرابة عشر دقائق بعد ان اهتز كل ما حوله  على اثر سقوط قنبلة كبيره .!
أخذ يلتفت كـ المجنون بحثا عن ...!
انه لم يبحث عن شيء فهو لم يفقد شيء .!
فما زال يتنفس ومازال جسمه سليم اذا لماذا الخوف .؟

كان الجو البارد جدا والوقت هو اول الليل وعلى مسافة ليست ببعيده نور مدينة يتلألأ في الظلام.... جر أرجله نحو تلك المدينه اللتي تبدو من بعيد جميله الى ان وصل الى مدخلها المزين بالورود وبالرسومات الجميله والمناظر الصناعية الخلابه وبالعبارات الترحيبيه الفخمه وإضاءة لا تجعل للظلام مدخل .!
وما ان دخل الى وسط تلك المدينه حتى لفه الظلام فجأه .!
ظل طوال الليل على مدخل المدينه وهو مستمتع بهذا الجمال الخلاب حتى الصباح  .!
وما ان بدأت خيوط الشمس حتى صُدِم بالواقع المزيف لهذه المدينة .!
لقد كانت شوارعها متسخه وقاذورات اهلها مرمية بإهمال وبيوتها مهترئه ومكشوفه على بعضها البعض واهلها غير مبالين الا في مدخلها الجذاب .!
عاد ادراجه الى حيث كان ..عاد وقد حمل بداخله كمية يأس كبيره في ان يجد ( طفله ) .!

الضياع المر

تعالي نبكي الذكرى ونبكي حلمنا المقبور=تعالي نسرق اللحظه ونذرف دمع مرهقنا

تعالي نكشف الخافي ولا يبقى بنا مستور=مدام الحظ يكرهنا وظرف الوقت يخنقنا

تعالي من لهب قلبي نشب الذكريات بخور=بزوايا هالمكان اللي به الفرحه تعانقنا

تعالي نمسح الصوره واثر بروازها المكسور=تعالي نجمع ابيات ٍكتبناها توثـّقنا

تعالي نشعل الشمعه ونسكب دمعنا المنثور=على حلم ٍ جمعنا للاسف مات وتفرّقنا

تعالي واحضني فيني بقايا العاشق المقهور=تعالي مابقى شئ بهالدنيا يشوّقنا

تعالي ناظري اسمك على كف النقى محفور=لاجل يبقى ليا منـّا تصافحنا وتعرّقنا

ولاجل غيرك يشوف اسمك ويتركني بدون شعور=انا ما ابغى يجي بيني وبينك من يضايقنا

انا تكفيني الذكرى معك دام الزمان يدور=عزاي انا بذلنا للنجاح ولكن اخفقنا

تلاقينا بعد عمر ٍ بسكين الوجع منحور=ودخلنا للضياع المر وسكينه تلاحقنا

تخاوينا مع القمرا ولكنـّا فقدنا النور=تشجعنا وحنـّا اضعف من سهام ٍ تخرقنا

جمعنا كل مانملك نبي جيش الامان يثور=ولكن خوفنا الاقوى غصبنا في مرافقنا

زرعنا الحلم لكنـّا رمينا حلمنا بصخور=جهلنا طمـّع الحزن وتغافلنا وغرّقنا

مشينا مادرينا وشهو المسموح والمحظور=تقرّبنا وتغرّبنا وبالماضي تعلقنا

قطفنا الشوك ماندري نحسب انه ثمر وزهور=وقف بحلوقنا غصّه ونار الصيف تصفقنا

تمادينا بأمانينا وعمرنا بالخيال قصور=وحنا تحت خط الفقـْر وجوع القلب حارقنا

بنينا اسوار يوم انـّا عزمنا لهدم ذاك السور=بدل مانجتمع فيها تفرّقنا وتعوّقنا

من المخطي وضيّعنا .؟من اللي بيننا معذور.؟=هو انتي.؟ او انا.؟ والا كبر هالحلم وهقنا.؟

تعالي نشكي ونبكي فلا نملك سوى هالدور=فقدنا كل مانملك كأن الفقد يعشقنا

تعالي مع ظلام الليل ونروي حلمنا المقبور=من دموع ٍبقاها داخل العينين يرهقنا

اشد مغريات ( القلم ) و ( ريشه _ الـ رسام_  الـ عازف )  هو الحزن

فهو يسيطر على كل الاحاسيس حتى يجعلنا نتفنن في نزفه و زفه للاوراق والمسامع

الحزن يعرض للقلم كل الاغراء=الين يكسي هالدفاتر كآبه

ومابين يديني هالقلم صابه اعياء=من كثر ماانزف به حروف الكتابه

ماني بأدور في حروفي عن اطراء=بالحرف ادور من جرحني غيابه

ابعد عن عيون مسحت كل الارجاء=ماشافته ووجيه غيره تشابه

عل القصيد يذكره ناس احياء=ماتوا سبب صده وضموا ترابه

ابعد وساد الحزن في كل الاجواء=وحد الظماء يروى بشوفة سرابه

ياللعجب ان الدوا نفسه الداء=والقلب يوخذ من عيونك نهابه

الرجل لو وصل السماء بيد حسناء=ردته طفل او يشيب بشبابه

وانا تعلقت بسحابه بلا ماء=سوداء تمادت في حدود الغرابه

كنت احسب اني عايش بوسط الاضواء=واثر العمى في قلب يشري عذابه

ورغم العمى لوتشبهه كل الاسماء=بالصوت واللتغه وزينه درا به

ماكل شخص تملحه لتغة الراء=وما احد يضيع دربه اللي مشى به

وانا ابكتب لو غدى جسمي اشلاء=يمكن قصيدي يوصله عند بابه

ويرجع بعطف الام لصغار الابناء=يرجع يعوضني ليالي غيابه

!!

يأس

المتفائل يرى اللون الابيض بداية حياة جديده  ( ميلاد )  ( فستان زفاف )

في لحظة يأس رأيت الابيض بوجهه الآخر

مايشد العين منظر هالبياض=من كثر مابي احس انه كفن

الحزن غطى على قلبي وفاض=والفرح لو جاه يمنعه الحزن

لو اثور بوسط صيحات اعتراض=اطلع من السجن وادخل في سجن

ثورتي صمتي وبالوجه امتعاض=ولقمتي شوكه وفي جسمي وهن

وقيدي الذكرى وطعناتي عراض=والاماني وسط يأسي يختفن

كل حرف داخل بقلبي وخاض =يطلع اسود في متاهات اللحن

( الفقد )

من المؤلم انتظار الغائب في المجهول .! والأكثر ايلاما هو غياب من لايرجى له عوده .!
مررت في الحالتين
وان كانت الثانية اشد ايلاما لانها تدخل في خانة ( الفقد ) وهي اشد ما يمر به الانسان فعندما يفتقد جزءا منه  يصعب عليه تعويضه .!
الانسان بتركيبتة اللتي خلقه الله بها لا يستطيع التخلي عن عضو مهما صغر ولا يستيطع اي عضو في جسمه ان يسد مكان عضو قد ( فقد ) .!
فأنا فقدت احد اعز اخوتي ولي من الاخوه مايقارب 12 ولكن لم يستطع اي منهم سد ذلك الفراغ الذي سببه فقد اخي محمد رحمه الله فكأني فقدت النظر فلا تستطيع اليد او الرجل او الانف او الاذن ان تملئ مكان العين ولو اجتمعت كل الاعضاء لم تستطع ان تملئ مكان العين !!
الفقد يسبب لدى الانسان صدمه تجعله ينظر للمستقبل بسوداوية شديدة تجبره على النظر للجانب المظلم وتذكي داخله اليأس .!
ويبقى الأمل معلقا بين الشفتين متى حاول تجاوزهما يموت .!
فلو قدر لاحد ان يدخل في اعماق من عانى من ( الفقد ) لوجده هشيم لايصلح لسكنى .!

ــــــــــــــــــــــــــــــــــــــــــــــــــ

ياقريبه مني اشاركك في اسمى شعور
ويابعيده عن عيوني واحتياجي لك كبير
من دخلتي في حياتي مابقى لغيرك حضور
وش لي بغيرك وانا اللي كنت من قبلك كسير
دان لك قلبي وحايل بيننا ألفين سور
 كيف اعديها لفيك قبل ماافنى بالهجير
وكيف ابصبر في ظماي وعيشتي في ارض بور
والطريق اللي مشينا به يعني بالمسير
أنتظر باكر بصمتي دام كل شئ محظور
وأركب الحلم الجميل وفي فضائاته أطير
من وعيت العلم و حظي من دبور ليا دبور
ليت مره يبتسم لي واذكره دايم بخير
رفقتي ويا التعب ماهي تراها من شهور
من سنيني ياحياتي قلبي لبطشه اسير
بعض الاحيان انتفض من ضيقتي ودي اثور
واذكر اني فاقد الحيله مثل شيخ ضرير
وازبن لصبري وهو قطره وضيقاتي بحور
آه يا ما اقسى شعور العجز في رسم المصير
ادري ان الوقت فينا ماوقف بعده يدور
وادري انا يابعد هالكون في وضع خطير
ياتلاقينا وعشنا عمرنا بجنه ونور
ياتفارقنا وبكينا عمرنا وطفل صغير
لا لقاء بلا فراق يشب نار بالصدور
واللقاء بعد الفراق الغالب انه ما يصير
امتلت كل الدفاتر مابقى فيها سطور
كلها مكتوب فيها احتياجي لك كبير

اخيرا

الحروف وسيلة نقل صغيره لاتحتمل البضائع الكبيره

بـقـايـا